Ther Tyngeh ka CoMSO ia ka NPP halor ka jingbym leh eiei jong ka halor ka jingiashim bynta jong ki riewlum ha ka elekshon sha Garo Hills

SHILLONG, LBER 16: Ka Confederation of Meghalaya Social Organizations (CoMSO) ka la ther tyngeh ia ka NPP halor ka jingbym leh eiei jong ka halor ka jingiashim bynta jong ki riewlum ha ka elekshon sha Garo Hills Autonomous District Council (GHADC) da kaba ong ba ia katei ka mat la shu iehnoh bein wat hadien ka jingduh bor MDA a 8 snem ha u snem.

Ha ka kyrwoh ba la pyllait hangne ha ka sngi u Blei, u chairman ka CoMSO u Roy Kupar Synrem u la ong ba ka jingpynslem jong ka NPP bad ka jingkren arsien ha ka sain pyrthei ka long ka bym lah ban pdiang.

“Ha ka por ba ka hok, ka jinglong, bad ki jingïada jong ka riti synshar jong ki riewlum trai ri ki don hapoh ka jingma, ka NPP ka la jied ban buhrieh ha lyndet ki kyntien thylli, ki jingpynslem, bad ka jingsngap jar kaba la kheiñ sting,” u la ong.

U Synrem u la bynrap ba ki jingkular kum “ban peit bniah ïa kane ka kam” ne ki jingpynthikna ba “ka NPP kan pynbeit ïa ka kam” kim pat biang katba ki jingduna ha ka aiñ bad ka jingkulmar ki dang sah.

“Lada ka sorkar ka burom shisha ia ka jingsynshar shimet jong ka GHADC bad ia ka hok jong ka jaidbynriew A•chik, ka dei ban leh mardor”, u la ong.

U la maham ba ka jingbym leh ei ei ka la pynmih ia ka jingartatien ia ka jinglong ba shisha bad ka mon sain pyrthei jong ka sorkar ba la ialam da ka NPP.

U chairman jong ka CoMSO u la dawa ïa ki lad ki lynti kiba rai ban pynneh ïa ka jinglong kyntang jong ka elekshon GHADC bad ban pynbeit ïa kino kino ki jingbym ïahap kiba ktah ïa ka hok riti synshar jong ka jaitbynriew A•chik.

“Ka jingiaishah jong ki trai ri trai muluk ka la nang kut noh. Kan poi ka por ba wat la katno katno ruh ki jingkren kin ym lah ban pynsngap jar ia ka jingbitar pyrshah ia kane ka jingshet kylla kaba dang iai bteng”, la maham u bah Synrem.

Naka bynta ki khubor phah 

Contact: 9612925466

Email: lyngkhoiborning@gmail.com 

Thank you for reading this post.